काठमाण्डौ । सरकारको आश्वासनपछि चिया उद्योगहरु खुलेका छन् । भारतले नेपाली चिया निकासीमा अवरोध गरेपछि बन्द भएका इलाम र झापाका चिया उद्योग बिहिबारदेखि खुलेका हुन् ।
सरकारले चिया उद्योगीका समस्या समाधान गर्न विशेष कार्यदल गठन गरेर चाँडो समाधान गर्ने आश्वासन दिएपछि उद्योगहरू खोलेको नेपाल चिया उत्पादक सङ्घका वरिष्ठ उपाध्यक्ष शिव गुप्ताले जानकारी दिए ।
चिया निर्यातमा अवरोधका कारण १० लाख किलोभन्दा धेरै चिया गोदाममा थन्किएपछि इलामका अर्थोडक्स चिया उद्योग असार १ गतेदेखि र झापाका सीटीसी तथा अर्थोडक्स चिया उद्योग असार ४ गतेदेखि बन्द भएका थिए ।
चिया क्षेत्रमा देखिएका समस्या समाधान गर्न प्रधानमन्त्रीको सचिवालयले विभिन्न मन्त्रालय र विभागका प्रतिनिधि सम्मिलित एक कार्यदल बनाएको छ ।