काठमाण्डौ । नेपाली कांग्रेसकी सांसद विष्णुकुमारी सापकोटाले गाँजा खेतीलाई कानुनी मान्यता दिन सरकारसँग माग गरेकी छन्।
राष्ट्रिय सभाको शुक्रबारको बैठकमा आगामी आर्थिक वर्ष २०८३/८४ को बजेटमाथिको छलफलमा भाग लिँदै उनले गाँजा खेतीको व्यावसायिक र औद्योगिक उपयोगबाट देशको अर्थतन्त्रमा ठुलो सुधार ल्याउन सकिने बताइन्।
सांसद सापकोटाले विगत तीन वर्षदेखि आफूले यो मुद्दा उठाउँदै आएको स्मरण गराउँदै गाँजाको औषधीय र औद्योगिक महत्त्वलाई ध्यान दिनुपर्ने बताइन्।
‘गाँजा खेती र यसको व्यवस्थापनलाई मनोरञ्जनको पाटोबाट मात्र नहेरी यसबाट उत्पादन हुने तेल, कपडा र औषधीजन्य उद्योग सञ्चालन गर्न सके लाखौँ युवाहरूलाई स्वदेशमै रोजगारी दिन सकिन्छ,’ सापकोटाले भनिन्।
सांसद सापकोटाले गण्डकी प्रदेश सरकारले आगामी वर्षको बजेटमा गाँजा खेतीसम्बन्धी अनुसन्धान र आय–आर्जनका लागि उत्पादन र मूल्य शृङ्खला विकास गर्ने नीति ल्याएकोमा प्रशंसा गरिन्।
सङ्घीय सरकारले पनि यसलाई प्राथमिकतामा राखेर तत्काल कानुनी बाधा अड्चन फुकाउनुपर्ने उनको माग थियो।